ප්‍රකට ඉන්දීය රංගන ශිල්පිනී රශ්මිකා මන්දන්නා මෑතකදී රූගත කිරීමක් අතරතුර සිදුවූ ආබාධයක් හේතුවෙන් ප්‍රතිකාර ලබමින් විවේක සුවයෙන් පසුවන අතර, ඒ පිළිබඳව විස්තර තොරතුරු ඇයගේ රසිකයන් වෙත ඉදිරිපත් කර තිබේ. 'Mysaa' නමැති චිත්‍රපටයේ නැටුම් ජවනිකාවක් රූගත කරමින් සිටියදී ඇයගේ උකුල් ප්‍රදේශයට මෙම ආබාධය සිදුවී ඇති අතර, එය ඇය මෙතෙක් රඟපෑ වඩාත්ම ආක්‍රමණශීලී චිත්‍රපටය ලෙස ඇය හඳුන්වා දෙයි.
මෙම සිදුවීමෙන් පසු ඇය කලක් මාධ්‍යවලින් සහ කාර්යබහුල ජීවිතයෙන් ඈත්ව සිටි අතර, මුලදී මෙම ආබාධය පිළිබඳව කිසිවෙකුට දැනගැනීමට නොලැබෙනු ඇතැයි ඇය බලාපොරොත්තු වී ඇත.
මෙය තමාට පිට පිට සිදුවූ තුන්වන ආබාධය බව සඳහන් කරන රශ්මිකා, තම ශරීරය යන්ත්‍රයක් ලෙස නොව මානුෂීය ලෙස සැලකීමට මින්පසු වගබලා ගත යුතු බව ප්‍රකාශ කර සිටින්නීය. තම ආබාධයේ ස්වභාවය පැහැදිලි කරමින් ඇය පවසන්නේ, කකුල සහ උකුල එකිනෙකට සම්බන්ධ කරන ඛණ්ඩරා හතර අතුරින් ඇගේ දකුණු උකුලේ පිහිටි එක් ඛණ්ඩරාවක් ගැලවී ගොස් ඇති බවයි. නැවතත් ඇයට කකුල එසවීමට සහ සාමාන්‍ය පරිදි චලනය කිරීමට නම් එම ඛණ්ඩරාව නැවත සකස් වී සම්බන්ධ විය යුතු බව ඇය වැඩිදුරටත් සඳහන් කරන්නීය.
තමා මුහුණ දුන් ආබාධය තදබල රිදවීමක් ඇති කළද එය දරාගත නොහැකි මට්ටමේ එකක් නොවන බවත්, තම කාර්යබහුලත්වය හමුවේ තමා විවේකයක් නොගන්නා බැවින් දෙවියන් විසින්ම තමාට ලබාදුන් අනිවාර්ය නිවාඩුවක් ලෙස මෙය දකින බවත් ඇය පවසන්නීය. මෙම හදිසි අනතුරු සියල්ල නොසිතූ මොහොතල සිදුවූ ඒවා වුවද, ලද විවේකය පිළිබඳව ඇය කිසිදු පැමිණිල්ලක් නොකරන අතර මෙම කාල සීමාව තුළ පසල් (puzzles) විසඳීමට පෙළඹී ඇති බවත්, තමා ඒ සඳහා තරමක් දක්ෂ බව වටහාගත් බවත් ඇය සඳහන් කරයි.
සාමාන්‍යයෙන් දැඩි ලෙස ව්‍යායාමවල නිරත වෙමින් සහ දිවීම මගින් ශරීර හැඩය පවත්වා ගන්නා තමාට, ඉදිරි කාල සීමාවේදී ව්‍යායාම කිරීමට නොහැකි වීම නිසා සිරුරේ බර වැඩිවේ යැයි බියක් පවතින බව රශ්මිකා පවසයි. ව්‍යායාම කිරීමට නොහැකි වන විට රසකැවිලි සහ අතුරුපස අනුභවයට වැඩි රුචිකත්වයක් දක්වන බැවින් සිරුරේ බර පාලනය කර ගැනීම අභියෝගයක් බව පවසන ඇය, තමා ගැන ව්‍යාකූල නොවී සිටින ලෙසත්, සියලු රසිකයින් වෙත තම ආදරය පිරිනමන බවත් පවසා තිබේ.