ඉන්දියාවේ පූනේහි පදිංචි 26 හැවිරිදි දේපළ වෙළඳ ව්‍යාපාරිකයෙකු වන කේතන් අග්‍රවාල්ගේ මරණය සම්බන්ධයෙන් මේ වනවිට ආන්දෝලනාත්මක තත්වයක් හටගෙන තිබේ. මේ ගැන සිදුකරන පරීක්ෂණවලදී ඉතා වැදගත් සාක්ෂිකරුවෙකු ඉදිරිපත් වී තිබේ.
මුලදී ලෝහගාඩ් බලකොටුවෙන් (Lohagad Fort) පහළට වැටීමෙන් සිදුවූ අනතුරක් ලෙස සැලකූ මෙම සිදුවීම, ඔහුගේ පෙම්වතිය වන සියා ගෝයල් සහ ඇයගේ අනියම් සැමියා යැයි කියනු ලබන චේතන් චෞද්‍රි විසින් සැලසුම් කරන ලද ඝාතනයක් බවට දැන් තහවුරු වී ඇත. මෙම සිදුවීම ප්‍රචාරයෙන් පසු ලෝහගාඩ් බලකොටුවෙන් (Lohagad Fort) නැරඹීමට සංචාරකයින්ගේ පැමිණීමද ඉහළ ගොස් ඇතැයි ඉන්දීය මාධ්‍ය වාර්තා කර තිබේ.
මෙම ඝාතන නඩුවට අදාළව පූනේ ග්‍රාමීය පොලිසිය විසින් මේ මස මුලදී පිටු 5,053 කින් යුත් චෝදනා පත්‍රයක් ද ගොනු කර තිබුණි. චේතන්ගේ මිතුරෙකු වන රිතේෂ් හංගේ නමැති තුන්වන සැකකරුවෙකු ද මේ වන විට අත්අඩංගුවට ගෙන ඇති අතර, සමස්තයක් ලෙස මෙම නඩුව සඳහා සාක්ෂිකරුවන් තුන් දෙනෙකු ඉදිරිපත් වී ඇත.
තම මිතුරාගේ පවුලේ අය සමඟ ලෝහගාඩ් බලකොටුව නැරඹීමට ගිය මෙම ප්‍රධාන සාක්ෂිකරුගේ අනන්‍යතාවය පොලිසිය විසින් රහසිගතව තබා ඇත. ඔහු පවසන පරිදි, බලකොටුවේ පඩිපෙළ නගින විට කේතන් සහ ඔහුගේ පෙම්වතිය වූ සියා එකට ගමන් කරමින් සිටි අතර, චේතන් ඔවුන්ට පිටුපසින් ගමන් කර තිබේ. අධික උෂ්ණත්වයක් තිබියදීත් චේතන් විසින් 'හුඩියක්' (hoodie) පැළඳ සිටීම හේතුවෙන් සාක්ෂිකරුට ඔහුගේ මුහුණ හොඳින් මතකයේ රැඳී ඇත. මෙම උණුසුම් කාලගුණය මැද හුඩියක් පැළඳ සිටින්නේ මන්දැයි සාක්ෂිකරු විසින් චේතන්ගෙන් විමසා ද තිබුණි. බලකොටුව මුදුනට ගිය පසු චේතන් දේවාලයක් අසල වාඩි වී සිට ඇති අතර, කේතන් සහ සියා ඉදිරියට යද්දී ඔහු නැවතත් ඔවුන් පසුපස ගොස් ඇත. මේ අතර, මෙම සිදුවීමට අදාළව තවත් සාක්ෂිකරුවෙකු ද ඉදිරිපත් වී ඇති අතර, ඔහුද ලෝහගාඩ් තරණයේදී චේතන්ව මුණගැසී ඔහු පැළඳ සිටි හුඩිය පිළිබඳව ප්‍රශ්න කර ඇති බවත්, එහිදී චේතන් සමාව අයැද ඉදිරියට ගිය බවත් ප්‍රකාශ කර තිබේ.
බඩේ අමාරුවක් හේතුවෙන් සුළු වේලාවකට එම ස්ථානයෙන් ඉවත් වූ ප්‍රධාන සාක්ෂිකරු නැවත පැමිණෙන විට, සියා විසින් චේතන් දෙසට අත දිගු කර පෙන්වන අයුරු දැක තිබේ. ඉන්පසු ඇය බිම වාඩි වී කේතන්ගේ කකුලට පයින් ගසා ඇති අතර, වහාම පිටුපසින් දිව ආ චේතන් විසින් ව්‍යාපාරිකයාව ප්‍රපාතයට තල්ලු කර දමා ඇත. තමන් දුටු මෙම සිදුවීම සම්බන්ධයෙන් සාක්ෂිකරු චේතන්ගෙන් ප්‍රශ්න කර ඇති අතර, එහිදී කෝපයට පත් වූ චේතන්, මේ පිළිබඳව නිහඬව නොසිටියහොත් ඔහුවද බලකොටුවෙන් පහළට තල්ලු කර දමන බවට තර්ජනය කර තිබේ.
මෙම තර්ජනය හේතුවෙන් දැඩි බියට පත් වූ ඔහු තම මිතුරාට හෝ මේ පිළිබඳව පවසා නැත. නිවසට පැමිණීමෙන් පසු ඔහුට උණ සහ ඇඟපත වේදනාව ද ඇති වී තිබේ. කෙසේ වෙතත්, පසුව ජනමාධ්‍ය හරහා මෙම සිදුවීම පිළිබඳ තොරතුරු දැනගැනීමෙන් අනතුරුව, සිද්ධියෙන් දින පහකට පසු එනම් ජූනි 23 වන දින ඔහු පොලිසියට ගොස් තමා දුටු දේ ප්‍රකාශ කර ඇත.
සාක්ෂිකරුවන්ගේ ප්‍රකාශවලට අමතරව, විමර්ශකයින් විසින් විශාල ඩිජිටල් සාක්ෂි ප්‍රමාණයක් ද පරීක්ෂාවට ලක් කරමින් පවතී. ජංගම දුරකථන හයක්, පෙන් ඩ්‍රයිව් නවයක්, දත්ත උපස්ථ (backups), ඇමතුම් වාර්තා සහ සමාජ මාධ්‍ය ගිණුම් ඇතුළත් ටෙරාබයිට් 12 ක පමණ තාක්ෂණික දත්ත පොලිසිය විසින් විශ්ලේෂණය කර ඇත. අයිෆෝන් (iPhone) වලින් දත්ත මැකීම, චැට් ඉතිහාසය මකා දැමීම සහ මකා දැමූ දත්ත නැවත ලබා ගැනීම වැළැක්වීමේ ක්‍රම පිළිබඳව සැකකරුවන් අන්තර්ජාලය හරහා සොයා බලා ඇති බව සෙවුම් ඉතිහාසය පරීක්ෂා කිරීමේදී හෙළි වී තිබේ. මකා දමන ලද ඇතැම් ඩිජිටල් තොරතුරු වෝහාරික විශ්ලේෂණ හරහා මේ වන විටත් නැවත ලබා ගැනීමට පොලිසිය සමත් වී ඇත.