වියට්නාම පොලිසිය විසින් මස් පිණිස ඝාතනය කිරීමට නියමිතව සිටි සුරතල් බළලුන් 400ක් පමණ බේරා ගැනීමට සමත් වී ඇති අතර, ඉන් 40 දෙනෙකු පමණ මේ වන විටත් ඔවුන්ගේ සැබෑ අයිතිකරුවන් වෙත භාර දී තිබේ. පසුගිය සතියේ සිදු කරන ලද මෙම මෙහෙයුමේදී, බළලුන් සොරකම් කිරීම සහ එකතු කිරීම සම්බන්ධයෙන් විශේෂඥතාවයක් දක්වන අපරාධ කල්ලියකට සම්බන්ධ පුද්ගලයින් නව දෙනෙකු අත්අඩංගුවට ගෙන ඇති බව හෝ චි මිං (Ho Chi Minh) නගරයේ පොලිස් නිල පුවත්පත වාර්තා කර ඇත.
මෙම වැටලීමේදී ජීවතුන් අතර සිටි බළලුන් 400කට අධික සංඛ්යාවක් සහ අයිස් මත තබා සංරක්ෂණය කර තිබූ මියගිය බළලුන් 80 දෙනෙකු බලධාරීන් විසින් සොයාගෙන ඇති අතර, වෙනත් ස්ථානයකින් තවත් බළලුන් 21 දෙනෙකු ද අත්අඩංගුවට ගෙන තිබේ.
වියට්නාමය තුළ සුනඛ සහ බළල් මස් අනුභව කිරීම නීත්යානුකූල වන අතර, බොහෝ අවන්හල් ඒ බව විවෘතව ප්රචාරය කරනු ලබයි. කෙසේ වෙතත්, මස් අලෙවි කරන්නන් විසින් අදාළ සතුන්ගේ මූලාරම්භය පෙන්වන සහතික ලබා ගැනීම අනිවාර්ය වේ. හෝ චි මිං නගරය තුළ බහුලව වාර්තා වූ සුරතල් සතුන් සොරකම් කිරීමේ සිදුවීම් පිළිබඳව ලද තොරතුරු මත පොලිසිය මෙම කල්ලිය පසුපස හඹා ගොස් ඇත. දකුණු වියට්නාමය පුරා වසර තුනක පමණ කාලයක සිට බළලුන් රවටා උගුල්වලට හසුකර ගත් බවට සැකකරුවන් එහිදී පාපොච්චාරණය කර තිබේ.
මෙම සිදුවීම සම්බන්ධයෙන් ජුනි 16 වන දින නිවේදනයක් නිකුත් කරමින් 'Humane World for Animals' නම් සත්ව හිමිකම් සංවිධානය පොලිසියේ තීරණාත්මක ක්රියාමාර්ගය ඇගයීමට ලක් කර ඇත. සොරකම් කරන ලද සතුන්ගෙන් 40ක් පමණ මේ වන විටත් ඔවුන්ගේ පවුල් වෙත එක් කර ඇති බවත්, එමගින් සතුන් විශාල ප්රමාණයකගේ ජීවිත බේරා ගැනීමට හැකි වූ බවත් ඔවුන් පෙන්වා දෙයි. එහෙත්, බේරාගත් බළලුන්ගෙන් 100ක් පමණ ඔවුන්ට මුහුණ දීමට සිදු වූ අමිහිරි අත්දැකීම් හේතුවෙන් පසුව මියගොස් ඇති බව ද එම නිවේදනයේ වැඩිදුරටත් දැක්වේ.
සොරකම් කරන ලද බළලුන් ඔවුන්ගේ පවුල් සමඟ නැවත එක් කිරීමට දරන උත්සාහයන් අඛණ්ඩව ක්රියාත්මක වුවද, නඩු විභාගය අවසන් වන තුරු සාක්ෂි ලෙස පොලිස් ස්ථානයේ රඳවා සිටින බළලුන් පිළිබඳව තම ප්රධාන අවධානය යොමු වී ඇති බව එම සංවිධානයේ කරන්වීර් කුක්රේජා (Karanvir Kukreja) ප්රකාශ කර තිබේ. ඒ සඳහා සිය සංවිධානය විසින් සතුන්ට ආහාර පරිත්යාග කර ඇති අතර, ඔවුන් දැඩි උෂ්ණත්වයෙන් ආරක්ෂා කර ගැනීම සඳහා විදුලි පංකා ලබා දීමට කටයුතු කරමින් සිටින බවද ඔහු සඳහන් කළේය. කෙසේ වෙතත්, මේ සම්බන්ධයෙන් ඒඑෆ්පී (AFP) පුවත් සේවය කළ විමසීමකට හෝ චි මිං නගරයේ පොලිසිය වහාම ප්රතිචාර දක්වා නොමැත.